ರಾಷ್ಟ್ರಪತಿಗಳ ಜೊತೆ ಸದಾ ಕಾಣಿಸಿಕೊಳ್ಳುವ ಮಿಲಿಟರಿ ಅಧಿಕಾರಿಗಳನ್ನು ನೋಡಿದಾಗ, ಇವರ ಜವಾಬ್ದಾರಿ ಏನು? ಇಷ್ಟು ಮಹತ್ವದ ಹುದ್ದೆಗೆ ಇವರ ಆಯ್ಕೆ ಹೇಗೆ ನಡೆಯುತ್ತದೆ? ಎಂಬ ಕುತೂಹಲ ಮೂಡುವುದು ಸಹಜ.
ರಾಷ್ಟ್ರಪತಿಗಳ Aide-de-Camp (ADC) ಹುದ್ದೆ ಸಾಮಾನ್ಯ ಸರ್ಕಾರಿ ಹುದ್ದೆಯಲ್ಲ. ಭಾರತೀಯ ಸೇನೆ, ನೌಕಾಪಡೆ ಅಥವಾ ವಾಯುಪಡೆಯ ಸೇವೆಯಲ್ಲಿರುವ ಅರ್ಹ ಅಧಿಕಾರಿಗಳಲ್ಲಿಂದಲೇ ಆಯ್ಕೆ ನಡೆಯುತ್ತದೆ. ಉತ್ತಮ ಸೇವಾ ದಾಖಲೆ, ದೈಹಿಕ ಸಾಮರ್ಥ್ಯ, ವೃತ್ತಿಪರ ನಡವಳಿಕೆ ಹಾಗೂ ವಿವಿಧ ಹಂತದ ಮೌಲ್ಯಮಾಪನಗಳು ಆಯ್ಕೆ ಪ್ರಕ್ರಿಯೆಯಲ್ಲಿ ಪ್ರಮುಖವಾಗುತ್ತವೆ.ಈ ಹುದ್ದೆಗೆ ಆಯ್ಕೆಯಾಗುವುದು ಮಾತ್ರವಲ್ಲ, ರಾಷ್ಟ್ರಪತಿಗಳೊಂದಿಗೆ ಕೆಲಸ ಮಾಡುವ ಸಂದರ್ಭದಲ್ಲಿ ಅತ್ಯಂತ ಶಿಸ್ತು, ಸಮಯಪ್ರಜ್ಞೆ, ಪ್ರೋಟೋಕಾಲ್ ಜ್ಞಾನ ಮತ್ತು ಸದಾ ಸಿದ್ಧರಾಗಿರುವ ಮನೋಭಾವ ಅಗತ್ಯವಾಗುತ್ತದೆ.ಮಾಜಿ ರಾಷ್ಟ್ರಪತಿ ADC ಆಗಿ ಸೇವೆ ಸಲ್ಲಿಸಿದ್ದ ಮೇಜರ್ ರಿಷಭ್ ಸಿಂಗ್ ಸಂಬ್ಯಾಲ್ ಅವರು ರಾಜ್ ಶಮಾನಿ ಅವರ ಸಂದರ್ಶನದಲ್ಲಿ ತಮ್ಮ ಅನುಭವಗಳನ್ನು ಹಂಚಿಕೊಂಡ ಬಳಿಕ ADC ಹುದ್ದೆಯ ಆಯ್ಕೆ ಪ್ರಕ್ರಿಯೆ ಮತ್ತೊಮ್ಮೆ ಚರ್ಚೆಗೆ ಬಂದಿದೆ.ವರದಿಗಳ ಪ್ರಕಾರ, ಆಯ್ಕೆ ಪ್ರಕ್ರಿಯೆಯಲ್ಲಿ ಅಧಿಕಾರಿಗಳ ಸಾಮಾನ್ಯ ಜ್ಞಾನ, ಪ್ರಸ್ತುತ ವಿದ್ಯಮಾನಗಳ ಅರಿವು, ಮಾನಸಿಕ ಸ್ಥೈರ್ಯ ಮತ್ತು ತುರ್ತು ಪರಿಸ್ಥಿತಿಯಲ್ಲಿ ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯ ಸೇರಿದಂತೆ ಹಲವು ಅಂಶಗಳನ್ನು ಗಮನಿಸಲಾಗುತ್ತದೆ.ರಾಷ್ಟ್ರಪತಿಯೊಂದಿಗೆ ನಿರಂತರವಾಗಿ ಕರ್ತವ್ಯ ನಿರ್ವಹಿಸುವುದರಿಂದ ಇದು ಕೇವಲ ಪ್ರತಿಷ್ಠೆಯ ಹುದ್ದೆಯಲ್ಲ. ವೈಯಕ್ತಿಕ ಸಮಯ, ಕುಟುಂಬದೊಂದಿಗೆ ಕಳೆಯುವ ಅವಕಾಶ ಮತ್ತು ಸಾಮಾನ್ಯ ಜೀವನಶೈಲಿಯಲ್ಲೂ ಹಲವು ತ್ಯಾಗಗಳನ್ನು ಮಾಡಬೇಕಾಗುತ್ತದೆ.ಇದೇ ಕಾರಣಕ್ಕೆ ರಾಷ್ಟ್ರಪತಿಯ ADC ಹುದ್ದೆಯನ್ನು ಸೈನಿಕ ವಲಯದಲ್ಲಿ ಅತ್ಯಂತ ಗೌರವದ ಹಾಗೂ ಜವಾಬ್ದಾರಿಯುತ ಕರ್ತವ್ಯಗಳಲ್ಲಿ ಒಂದೆಂದು ಪರಿಗಣಿಸಲಾಗುತ್ತದೆ.
